متأفورش في الخوف من الفشل

متأفورش في الخوف من الفشل

أنت خايف؟

خايف متعرفش توصل للي انت عايزه؟

خايف تجرب حاجه جديده لمتنجحش فيها؟

خوفك من الفشل بيخليك مش عليز تجرب او تحاول؟ 

المشكله مش انك تبقي خايف من الفشل..لأن الخوف في حد ذاته شئ كويس

 عشان بيخليك تحسب حساباتك و تحاول ما تقعش في اخطاء.

 المشكله الحقيقيه لما تأفور في الخوف من الفشل لأنك بكده بتبقي دايما حاطط الفشل قدام عينيك,

 و طول ما بتفكر انك خايف منه طول ما هتلاقيه قدامك

 و طول ما هيمنعك انك توصل للي بتحلم بيه.

لو فضلت تخاف انك تحاول لتفشل فأكيد لازم تفشل

لأنك ساعتها هتبقي بتفكر ازاي تفشل مش ازاي تنجح,

 إنما لو حطيت في بالك انك هتنجح فهتعمل كل حاجه

 تقدر عليها عشان توصل للنجاح حتي لو ما كنش الوصول للنجاح ده سهل.الغلط مش انك تخاف من الفشل,

الغلط ان خوفك ده يمنعك من انك تحلم و تشتغل و توصل للي نفسك فيه.و عشان كده بقي متأفورش ابدا في الخوف من الفشل ;)
  اصحاب مكان فكرة من الأعضاء " سهير أسامة "

تقديم : صوت المصريين

الانسان بين الفرح والحزن

الحقيقه ان انا اكتشفت ان في شعره بين الفرحه والحزن

 طبعا سيبنا من اعلان بريل خاااالص بالنسبه للشعره دي ونركز شويه 

بجد انا اكتشفت ان الفرق بسيط جدا وسهل ان انا اما اكون في قمة الحزن اقلب 180 درجه وابقي في قمه السعادة طيب ازاي يا عم انت وايه الي انت بتقوله دا ؟؟؟

هقولك انا بقي ازاي 

في محاضرة من كورس اسمه البرمجه اللغوية العصبيه دكتور ابراهيم الفقي قالنا حاجه حلوه قوي ان الانسان هو الوحيد القادر علي صنع ما يريد وقت ما يريد طبعا بعد ارادة الله سبحانه وتعالي دي مفيش خلاف ولا جدل عليها 

طيب ازاي موصلناش لحل برضو ؟؟

بسيطه قوي جرب كدا شغل اغنيه حزينه جداا انت بتكون بتحبها وعيش مع الاغنيه دي وانت هتشوف حالتك سعتها عامله ازاي وبعد كدا بعديها علي طول شغل اغنيه بتتكلم عن السعاده او اغنيه انت لما بتيجي تسمعها بتبقي عايز تتنطط من علي الارض وعيش معاها برضو هتلاقي نفسك اتغيرت فعلا ومن حزن شديد جواك اتقلب ل فرح وعايز تجري وتلعب 

طيب يا فرحتي وبعدين 

وبعدين دي بقي مش هتبقي بتعتي انا هتبقي بتعتك انت انت الي هتبقي عارف تعمل ايه امتا وفين وانت الي هتبقي عارف تعمل ايه لما يكون فيك ايه علي فكره انا مش بقول الغاز او بتكلم بالشفره دي حقيقه الواحد لو فكر ان هو خلاص هينجح وان هو انسان ناجح اصلا مش فاشل هتلاقيه فعلا بيتفوق وبينجح والعكس صحيح تمام لما يكون واحد بيفكر بيأس شديد هتلاقيه كاااااارة كل حاجه حوليه حتي لو بينه وبين النجاح هي الشعره الي بين الحزن والسعاده دي الخلاصه شوف انت عايز تبقي فين ودوس  مش شرط بقي تدوس ازاي المهم ان انت تلحق قبل ما ترجع تقول يا ريتني كنت 

لقمة عيش ومتغممسه بالذل

امباريح وانا نازل من البيت ومبسوط وعندي بصيص من الامل

علي رأي احمد مكي ان اليوم هيكون جميل ونازل نشيط ومستريح نفسيا علي الاخر وكله كان ماشي تمام ولاكن ايوه هي المشكله بقي في لاكن وصلت الف مسكن

 والي كان راح الف مسكن امبارح كان هيحس ان في انقلاب بيتم هناك

 او مظاهره جامده وبتطالب بحضور رائيس الجمهوريه

 لاكن الحكايه غير كدا خااالص الحكايه ان سائقي الميكروباص

 قالو النهردا اول يوم رسمي في المدارس والجامعات

وهيئة النقل العام كمان عامله اضراب طيب ايه المشكله

اننا احنا كمان نعمل اضراب اهو يبقي اضراب جماعي المشكله بقي ان انت لما تبص عليها من الناحيتين متلقيش حد غلطان 

اذاي متعرفش لاكن هقولك بص يا سيدي اولا سائق الميكروباص مش من حقه يعمل اضراب

 لان دا بيعطل مصالح الناس وطبعا دلوقتي محدش بقي يقدر يستغني عن الميكروباص طيب وبعدين تعالي بقي لسائق الميكروباص

 او صحبه لما اتكلمت معاهم امباريح واحنا وقفين وهما منعين اي عربيات تحمل من جوه الموقف

 لقيتهم بيشكو مر الشكوي الي عليه مخالفات 20 الف جنيه

 والي رخصه مسحوبه علشان ظابط رخم عليه والظابط حاطت الرخص في جيبه ومش عايز يسلمها المرور طيب يعني بالذمه كدا لما صاحب ميكروباص يجيلو مخالفات ب 20 الف جنيه

 هو اصلا بيكسب كام علشان كل المخالفات دي واصلا

دا لو كل يوم بياخد مخالفه في الطريق خط  السير بتاعه مش هتوصل للرقم دا

 فا ترجع وتقول هما من حقهم هما كمان يعيشو طيب كدا ايه المشكله والحل عند مين

اقولك هذا من فضل ربي

 ولو لقيت حل ابقي قلي عليه شعب بقي وخدها بالدراع ومش مراعي ظروف البلد بأي حال من الاحوال وهنا نرجع الي شعار الشعب المصري مصلحتي اولاااااا وشكرا وفي الاخر يلا بينا نروح نسمع بلاك تيما وهما بيقولو زحمة 

دم .. هم .. صرخة أم

دم .. هم .. صرخة أم

عندما فتحت مدونتي لاتحدث عن هذه المجزرة انتابني حاله من الحزن والبكاء الشديد ولا اعلم من اين ابدء ولا اعرف اين الجاني فالجاني مصري والمجني عليه ايضا مصري

هل جزء شاب برئ ذهب ليشجع فريقه فكلنا نعلم ان الكره هي المتنفس الباقي للشباب وايضا كثير من الشعب المصري

وعندما رئيت صراخ ام علي ولدها الذي لم يكون غير انه ذهب ليشجع فريقه مع اصدقائه ولكن عندما يعود الي امه يعود جثمان قتيل  دون ادني ذنب فعله , ولكن اين الجاني هل الجاني هو المجلس العسكري ؟ لكونه هو الذي يقوم بأدارة شؤن البلاد ام يكون وزارة الدخليه ؟ وهي ما ارادة ان ترد الصاع صاعين للالترس الاهلاوي في ذكري موقعة الجمل

ام الطرف الثالث ؟ لحدوث شغب وفوضي لصالح جهة حتي الان غير معلومه

ولاني اتذكر هنا مشروع الشرق الاوسط الكبير وهل اصبحت مصر مقسمه الي عدة شعوب وعدة دول مثل ما تحلم امريكا في تقسيم الشعب المصري مثل تقسيم السودان من قبل ؟ وهل نحن سنرضي فعلا بذلك الوضع

منذ قليل وانا اشاهد الاخبار وجدت الالاف من الشباب امام وزارة الدخليه للتنديد بما حدث في مجزرة بورسعيد امس

فهل نحن الان نسير علي خطي مجزرة اخري لشارع محمد محمود ؟

عدة اسئله علينا تحليلها ومعرفتها جيدااا وان نتذكر دائما اننا جميعا مصريين دم وشعب ووطن واحد يجب علينا جميعا ان نعرف ذلك لموجهة الاحدث للوصول الي بر الامان

متي سنقول ان ثورتنا قد وصلت الي بر الامان ونري ولو قليل من نور الامل نحو المستقبل

لا استطيع ان اقول غير لكي الله يا مصر وربنا يصبر امهاة القتلي ونحسبهم عند الله شهداء وعلينا هنا ان نعلم جيدا ان هناك فتنة بين فئات الشعب وفي مثل هذا الوقت قال اشرف الخلق محمد صلي الله عليه وسلم(عن بن عمرو بن العاص قال:
(بينما نحن حول رسول الله صلى الله عليه وسلم إذ ذكر الفتنة فقال: إذا رأيت الناس قد مرجت عهودهم، وخفت أماناتهم، وكانوا هكذا -وشبك بين أصابعه- قال: فقمت إليه فقلت: كيف أفعل عند ذلك جعلني الله فداك؟
قال: الزم بيتك، واملك عليك لسانك، وخذ بما تعرف، ودع ما تنكر، وعليك بأمر خاصة نفسك، ودع عنك أمر العامة)